I te ra 4 o Mati kua rave atu te Opita o te Tu ‘anga Taporoporo o Mauke i tetai porokaramu koia oki no runga i te ngai kākapu‘anga vai (WETLAND), ki te pupu rua o Apii Mauke i runga ia Akatokamanava.
Kua akamata atu ta matou porokaramu na roto i te apii‘anga i roto i te are apii e 20 miniti. Kua riro teia e na te Opita o te Tu‘anga Taporoporo o Mauke, a Maine Moetaua, i rave. Kua akamarama atu aia ki te au tamariki apii, eaa te ngai kākapu‘anga vai (wetland), eaa tona puapinga, eaa te au taui‘anga e kitena ia nei, te peu taito a te Pa Metua no te ta‘anga‘anga i teia ngai e te peu o teia ra. Kua akamarama katoa aia te au ‘anga‘anga ta te tangata e rave nei i teia ra, e riro nei i te takinokino atu i te ngai kākapu‘anga vai.
Kua karokaro katoa matou i tetai au ravenga no te paruru atu i te au ngai kākapu‘anga vai tei matau ia ei ngai tanu pai taro, kia vai ruperupe ua te reira no te uki o apopo. I muri ake i ta matou apii i roto i te are apii kua aere atu mataou ki raro Makatea no te rave atu i te tuanga 2 o ta matou porokaramu.
Kua akapu‘pu ‘ia te au Tamariki apii ki roto e 3 ‘pu‘pu no te au ‘anga‘anga ta ratou ka rave. Pupu 1- Ka karokaro atu ratou te au tū ‘anga‘anga ta te tangata e rave nei me kare taui‘anga e raveia nei i raro i te vai. Pupu 2 – Paruru e te tiaki, kimikimi‘anga ravenga i te paruru‘anga e te tiaki‘anga i te reira ngai ei meitaki no apopo. Pupu 3 – One e te vai, karokaro i te turanga o te vai e te one i raro i te pai taro, eaa te tuke o te vai e te one i raro i te vai e to runga i te enua. Pera katoa kia marama te au Tamariki apii i te turanga o te ngai kākapu ‘anga vai ei ngai pai taro.
Te puapinga o teia rave ‘anga‘anga kia akamatūtū atu i te Tamariki apii i to ratou kite karape no runga i te ngai kākapu ‘anga vai ei ngai pai taro. Karokaro e te akarongorongo matatio, e kia marama ratou me kare, kia kite ratou i te akono i te Ao Ora Natura e takapini nei ia ratou.
Kia iriiri mai ratou i to ratou manako paruru, ruaaraara, ‘anga‘anga kapiti e te tu karape i roto ia ratou tatakitai. Kua rauka ia ratou i te ‘akaari mai i teia au tu karape e pera katoa i te pa‘upa‘u atu ‘anga i te au ui‘anga tei oronga iatu kia ratou. Kua rauka katoa ia ratou i te akaari mai kia matou ta ratou i koikoi mai, to ratou au manako e ta ratou i marama no runga i te au ui‘anga tei oronga iatu.
Kua akari mai te Tamariki apii i to ratou tu oaoa, akarongo, e te inangaro i te tamou i te apii‘anga tei ‘o‘ora ia kia ratou ei meitaki rae no ratou. Kua ‘o‘ora mai a Poetiare Rakei i tona manako i taua ra, “E tamaine au kare e aere ana ki raro i te Pa‘i taro, inara mari ake teia porokoramu na Maine Moetaua, kua marama au te puapinga o te au pu rakau e tu nei i raro i te ngai kākapu ‘anga vai, pera katoa te pu‘apinga kia taporoporo tatou i teia au ngai no ta tatou au pai taro i runga nei ia Mauke, reka te akarongo i te au akamatakite‘anga, te au tu rapakau‘anga e te vai atura i akakitekite mai ei te puapii Moetaua vaine kia matou”.
Kua marama te au Tamariki apii i te au puapinga o te au ngai kākapu‘anga vai ei ngai tanu Taro i runga nei ia Akatokamanava. Ko ta ratou orama e umuumu nei koia kia vai ruperupe teia ngai o Mauke e pera te turanga o Mauke note uki o apopo.
Tataia e Raita Moetaua
