I te ra 1 o Tepetema kua tae mai e 3 pupu tangata ki runga ia Akatokamanava koia a Jessie Nicholson, Takili Tairi e Puna Kamoe, e turuturuia e te Tu’anga Taporoporo no runga i teia porokoramu tei akatinamou ia no Mauke koia oki takore atu anga i te Pokutekute (Red Passion fruit) i runga i te enua.
Ra 2 o te porokaramu, kua akaaravei atu ratou i te toenga o te pupu tei akatakaia ei tauturu atu i teia porokaramu, pera katoa, akakitekite atu anga i te takaianga o te vairakau e pera te au ravenga paruru me taangaangaia te vairakau ki runga i teia rakau poitini. Te au takaianga o te mapu ti rira teia au rakau kikino, kua riro e na takili teia tuanga i akakitekite me kare akamarama mai kia matou i taua ra. Kua akamarama katoa mai a Takili kite katoatoa, e akapeea tikae me taangaanga i te hand sprayer e te knapsack e te puapinga o teia nga pakau no teia turanga angaanga. Te au takaianga mua, ka anoanoia koe kia rave muake ka taangaanga ei koe i teia nga pakau e rua (hand sprayer, knapsack), ei paruru rae iakoe kia kore te vairakau e totoa me kare pana mai ki runga iakoe ei matakiteanga noou uaorai no te mataiti ki mua.
Kua rave atu matou i te mapu anga o teia rakau kikino, akamata mai i Uriaata e tae rava atu ki Tokoroa. Kua tapupu ia matou e 2 pupu raro ake i te akatereanga a Puna raua ko Takili note tuanga o te GPS, te puapinga o teia, kia kite matou eaa te mamao o teia rakau no runga i te aranui ki roto i te makatea mei tetai 20-mita. Kua autu atu ta matou angaanga i raverave atu i taua ra.
Te toru o te ra, kua akamata atu matou i te taangaanga i te vairakau ki runga i te pokutekute, inara i muake te reira kua apii mai a Takili ia matou no runga i te kairo anga i te varaikau, te vaito te ka anoanoia kia kairoia ki roto i nga moina. Kua riro teia e na Vainetutai, Tutere e Moana i kairo raro ake i te akamaramaanga a Takili.
Te tua ki tai i Uriaata aere uatu ki roto i te oire kua taangaanga atu matou i te matini (excavator 18 ton), i runga i te au ngai tei makaia note takore atu i te pokutekute te puapinga tikae o te matini koia oki note kiriti mai anga i te tumu o teia rakau e kia akaputuia tai ngai, mama kite aronga te ka pipi atu i te vairakau na runga e pera takapine i te ngai ti ria te rakau. Te au ngai kekena i roto i te makatea kua uuti rima ua matou teia e pera tipitipi aere teia rakau tei totoa atu na runga i te pu rakau. Kua rave matou i teia turanga angaanga e tae rava atu kite openga o te maka.
Kia akameitaki ia te Tuanga Taporoporo no teia tei tupu ki runga ia Akatokamanava, e pera katoa kite RIR Project, te NBSAP, e te 7NR no te tauturu mai i teia porokoramu no runga i te tuanga o te moni. Te au pupu tangata tei tapiri katoa mai i te tauturu atu i teia porokoramu no roto mai te Tipatimani o te Tuanga Tanutanu; Tuaine Oaariki, Vainetutai Moetaua, Peter Moetaua, Kura Tamaka, Papa Une (Beautification Manager), Marcellino Akamoeau (Areora Island Council) e pera katoa a Moana Aberahama (youth), no te angaanga manea e te taokotai tei raveia i teia nga ra i topa. Kua riro teia ei akaparauanga naau e Akatokamanava, no teia ra e te au ra ta tatou ka tomo na roto.
